Што се случило: Масовна тепачка во која учествувале неколку десетици луѓе се случила на кејот на Вардар во близина на националната Т-Арена. Според неофицијалните информации од очевидци, тепачката се случила помеѓу навивачките групи на Вардар и Шкупи, непосредно по одржувањето на првенствениот меч пред празни трибини (со оглед на тоа дека тогаш Вардар ја издржувал казната од фудбалската федерација за играње пред празен стадион) и имало повеќе повредени лица, а неколкумина биле и приведени. Истата вечер, според информации од МВР преземени од медиумите, група младинци, најверојатно членови на навивачката група „Комити“, револтирани од приведувањето на нивни членови кои учествувале во нарушување на јавниот ред и мир на фудбалскиот натпревар помеѓу ФК „Вардар“ и ФК „Шкупи“, кој се одиграл на националната Т-Арена во Скопје, организирани во две групи, почнале да фрлаат камења и други тврди предмети кон објектот во кој е сместена Полициската станица – Центар.
Датум, време и место на инцидентот: 19 февруари, околу 15:20 часот, кеј на Вардар, Скопје.
Извор на информации: Електронски медиум Прес 24.мк.
Инволвирани жртви: 2 лица.
Вид на злосторства: Насилство (Член 386, КЗ), Телесна повреда (Член 130, КЗ), Учество во тепачка (Член 132, КЗ)
Сторители: Група од непознат број навивачи од навивачките групи на Вардар и Шкупи.
Кус опис на инцидентот со пристрасни индикатори: Во овој инцидент кој се случил непосредно по одржувањето на спортски натпревар, пристрасниот мотив е етничко потекло, државјанство или јазик, а пристрасните индикатори се:
1. Разлика во етничкото потекло – членовите на навивачките клубови на фудбалскитеклубови Вардар и Шкупи се со различно етничко потекло;
2. Време – инцидентот се случил по фудбалски натпревар помеѓу клубовите чии навивачи / поддржувачи имаат различно етничко потекло.
3. Модел на претходни инциденти – на овој инцидент му претходи инцидент од истиот ден, кога две малолетни лица, најверојатно навивачи на ФК Вардар беа нападнати од страна на навивачи на ФК Шкупи.
Статус на случајот: Непознат.
Одговор на локалните власти: Според одговорот добиен од МВР по однос на Барањето за информации од јавен карактер испратено од страна на МХК, во врска со овој кривично-правен настан од страна на СВР Скопје до ОЈО Скопје било поднесено писмено Известување во врска со кривично дело „Насилство“ предвидено и казниво по член 386 од КЗ. КУ бр.1743/17.
Влијание врз жртвите и заедницата: Инциденти од ваков вид ја доведуваат во прашање општата безбедносна состојба во земјата, соживотот помеѓу различните етнички групи во општеството и безбедноста на луѓето присутни на или во близина на спортски натпревари.
